වීදි ආහාරවල අතීතයට කිමිදීම සුවඳින් පිරි රාජකාරියකි. වර්තමාන 'ස්ට්‍රීට් ෆුඩ්' සංස්කෘතිය එදිනෙදා ජීවිතාංගයක් තරමට සමීප වී ඇති විට ලේයරයෙන්, ලේයරය ගලවා අතීතයට බැසීම ඇත්තෙන්ම සුවඳ විහිඳුවන ක්‍රියා පටිපාටියකි. වසර දහසකට එහා අතීතයේ ග්‍රීසියේ වීදිවල පුලුස්සන ලද මාංශ විකිණීමෙන් වීදි ආහාර සම්ප්‍රදාය ඇ‍රැඹියා යැයි සැලැකේ. පුරාතන ග්‍රීසියේ දුප්පතුන් අතර මේ වීදි ආහාර අතිශය ජනප්‍රියව පැවැතියේ යැයි සඳහන්ය. උදුනක් හෝ ලිපක් මිලදී ගැනීමට තරම්වත් වත්කමක් නොමැති, නිවාස නොමැති මිනිසුන් අතර මේ වීදි ආහාර ජනප්‍රියව පැවැතියේ ඔවුන්ට වෙනත් විකල්පයක් නොමැති බැවින් විය යුතුය. පුරාතන චීනයේ වීදි ආහාරවල ඉලක්ක වෙළෙඳපොළ වී තිබී ඇත්තේ දුප්පත් මිනිසුන්ය. එහෙත් පෝසතුන් පවා තමන්ගේ අතවැසියන් වීදි වෙතට යවා ආහාර මිල දී ගෙන තමන්ගේ සුව පහසු නිවාස ඇතුළට වැදී රස බලා ඇත. ඒ තමන්ට අහිමි දුප්පතුන්ට හිමි විශේෂ විනෝදය කුමක්දැයි පරික්ෂා කර බැලීමට විය යුතුය. පුරාතන චීනයේද වීදි ආහාර යනු අතිශය ජනප්‍රිය සංස්කෘතිකාංගයකි.

වීදි ආහාර දශක ගණනාවක් මුළුල්ලේ ක්‍රම ක්‍රමයෙන් දියුණු වෙමින් පැවැතියකි. පැරීසියේ කුඩා කරත්තවල සහ කූඩාරම්වල පටවාගත් පේස්ට්‍රි වර්ග විකුණූ ඉතිහාසය පිළිබඳ කළු-සුදු පින්තූර සමඟ අතීතය පිවිසෙන්නට ඔබට ඉඩ ඇත. මේ පැරීසියේ පේස්ට්‍රි වර්ගවල පිරවුම් ද නූතන ඉවුම් පිහුම් වැඩකරුවන් අන්ද මන්ද කරවන සුලු ඒවාය. මාංශ සේම එළවළුද සමෝසමේ දමමින් සකසා ඇති පේස්ට්‍රි ඉතා සුළු මුදලකට මිල කර තිබී ඇත. විශේෂයෙන්ම කය වෙහෙසමින් වැඩ කරන කම්කරුවන් තමන්ගේ දෛනික වේතනයෙන් යම් මුදලක් වැයකොට මේවායෙන් ආහාර මිලදීගෙන ඇත. සුප්‍රකට '‍ෆිෂ් ඇන්ඩ් චිප්ස්' ආහාර සංකලනයත් මෙකල අතිශය ජනප්‍රිය වූවකි.

පුවත්පතක ඔතන ලද රස වෑහෙන පුලුස්සන ලද මාළු සහ පිලිස්සූ අර්තාපල් තීරු එකල වෙනත් රස තීරුවක් වෙන් කරවාගෙන සිටින්නට ඇත. පුලුස්සන ලද මාළු ඉපැ‍රැණි ඊජිප්තු වැසියන්ගේත් ප්‍රියතම ආහාරයක් වී තිබී ඇත. එතැනින් උතුරු අප්‍රිකාවටත්, ස්පාඤඤයටත් බෝ වුණ මාළු පිලිස්සුම් ක්‍රම ක්‍රමිකව වෙනත් රාජ්‍ය කරාද වෙනස් මාදිලිවලින් ව්‍යාප්ත වන්නට ඇත.

නාගරීකරණය හේතුවෙන් වීදි ආහාරවල මූලික වෙළෙඳපොළ සහ අරමුණ වෙනස් වී ඇත. එක්තරා කාලයක තම නිවෙසේ උදුනක් නැති නිසා දුප්පතුන් මිලදී ගත් වීදි ආහාරම තවත් කාලයක අධික කාර්යබහුලත්වය නිසා පෝසත් පුද්ගලයන් අතට විතැන් වී ඇත. ක්‍රම ක්‍රමයෙන් වීදි ආහාර ක්ෂණික ආහාර බවට රූපාන්තරණය වීම කලින් කියූ නාගරීකරණයේ එක් නරක ප්‍රතිඵලයකි. ‍රැකියාවෙන් ගෙනෙන වෙහෙස, ගමන් වෙහෙස ආදී දහසක් කාරණා මැද නිවසේ ආහාර ඉවීමෙන් ඈත් වීමට පොදු තීරණයක් ගත් මේ නාගරික ජනයා පිසූ ආහාර මිලදී ගැනීමේ සංස්කෘතිය වෙත නොදැනුවත්වම සංක්‍රමණය වන්නට වූහ.

පිසූ ආහාර අතරත් ක්ෂණික ආහාර ‍රැල්ලක් ලෝකය පුරා හමා යන්නට වූයෙන් ශරීරයට අහිතකර ආහාර බොහොමයක් සමාජගත වන්නට විය. මේ හරහා අධික ස්ථූලතාවයෙන් පටන් ගත් රෝග ‍රැල්ලක් ද ලෝකය පුරා හමා ගිය බව කිසිවකුට අමතක කළ නොහැකිය.

රස නහර පිනවන, දිව පුලුස්සන රස සහිත ක්ෂණික ආහාර සමඟ කෙටි ආහාර පුරුදු ද ඉන් පසුව බෝ වන්නට විය. මේ බොහෝ දේ වෙළෙඳ උපක්‍රම මිස ඉල්ලුම සහ සැපයුම ඉ‍ටු කිරීමක්ද නොවේ. මේ බහුතරයක් වීදි ආහාරවල මිල ගණන් වෙනත් ආපනශාලාවලට වඩා අඩු වීමද අනෙක් විශේෂ කාරණයයි. ඉන්දියානුවන්ද මෙකී වීදි ආහාර සංස්කෘතියට වෙනත් රසකින් දායක වු තවත් රටකි. තල්ලු කරගෙන යන කරත්තවලින් ඇ‍රැඹුණු ඉන්දීය වීදි ආහාර සංස්කෘතියේ ජනප්‍රිය අංග රාශියකි. බටහිර බහුතර ආහාර වර්ග ඉන්දියානු ක්‍රමයට යහමින් මසාලා දමමින් සැකසීම හේතුවෙන් ඔවුන් නොමැකෙන සටහනක් තබා ඇත.
ඔවුන්ගේ ආහාර සංස්කෘතිය ඇතුළත ඇති අන් තැනක නැති අපූර්වත්වය ඊට හේතු වන්නට ඇත. එබැවින් වීදි ආහාර ඉතිහාසය සේම එහි වර්තමානයත්, අතීතයත් ගැන කතා කරන විට අපට ඉන්දියාව අතහැරිය නොහැකිය. ආහාර සහ කෘෂිකර්ම සංවිධානය 2012දී නිකුත් කළ වාර්තාවකට අනුව ඉන්දියානුවන් බිලියන 2.5ක් දෛනිකව වීදි ආහාර අනුභව කරයි. මේ වාර්තා තරමක් පුදුමය ඇති කරවන සුලුය. වසරක් පාසා දිල්ලියේ පැවැත්වෙන වීදි ආහාර උළෙල මේ සඳහා හොඳම උදාහරණයකි.

කෙසේ නමුත් මෙතුවක් කාලයක් රට රටවල වීදි ආහාර සංස්කෘතියක් නොනැසී පවතින්නේත්, වැඩී වර්ධනය වන්නේත් නොනවත්වාම ඒ ආහාර මිලදී ගත් මිනිසුන් හේතුවෙනි. ඔවුන් නොදැනුවත්ව සෑම රටකම වීදි ආහාර සංස්කෘතියට වැඩෙන්නට පොහොර සපයා ඇත. වීදි ආහාර යනු සෑම රටකම මිනිසුන්ගේ ආහාර ‍තෝරා ගැනීමේ වඩාත්ම දියුණු අවස්ථාව ලෙස හඳුන්වා දුන හොත් එහි කිසිදු වරදක් නැත.

කාංචනා අමිලානි
-Dinamina-

වෘත්තීය චිත්‍ර ශිල්පියෙකු, දේශපාලන ක්‍රියාකාරියෙකු, පක්‌ෂ නායකයෙකු (National Socialist Worker's Party), ග්‍රන්ථ කතුවරයෙකු ( Mein Kamp - My Struggle), හිටපු ජර්මානු අගමැතිවරයෙකු. හිටපු ජර්මානු චාන්සලර්වරයෙකු හා හිටපු ආඥාදායකයෙකු වූ ඇඩොල්ෆ් හිට්‌ලර් ගේ ( Adolf Hitler 1889 - 1945 ) -සුපිරිසිදු ආර්ය මනෝරාජ්‍යය මුළුමහත් යුරෝපය පුරාම යථාර්ථයක්‌ බවට පත් කරනු පිණිස නාසි ( Nazi ) හමුදාව විසින් 1938 මාර්තු මස 12 වැනි දින ඕස්‌ටි්‍රයාව (Austria) ආක්‍රමණය කිරීමත් සමග නිල වශයෙන් ඇරඹි දෙවැනි ලෝක යුද්ධය (Second World War 1938 - 1945 ) 1945 මැයි මස 08 වැනි දින නිල වශයෙන් නිමාවට පත්වූයේ ලෝක ඉතිහාසයට තවත් එක්‌ මහා මානව ෙ€දවාචකයක්‌ එක්‌ කරමිනි. එක මිනිසෙකු ගේ නොසිඳුණු බල තණ්‌හාව නිසා ඇතිවුණු ක්‍රියාදාමයක ප්‍රතිඵලයක්‌ වශයෙන් දෙවැනි ලෝක යුද්ධය ඇති විය. මෙමගින් අකාලයේ විනාශ වූ මිනිස්‌ ජීවිත සංඛ්‍යාව අතිවිශාල ය. මෙය දළ වශයෙන් කිවහොත් අකාලේ විනාශ වූ මිනිස්‌ ජීවිත සංඛ්‍යාව මිලියන පනහකට (මිලියන 50,000,000 ) ආසන්න බව කියෑවේ. තවත් මිලියන ගණනාවක්‌ සදාකල් ආබාධිතයන් බවට පත්විය. එසේම මතු අනාගතයේ දී ඉපදෙන්න තිබුණු ජීවිත තවත් මිලියන ගණනාවක්‌ මෙලොව එළිය දකින්නටත් පෙරාතුව අකාලයේ විනාශය ට පත් විය. එපමණක්‌ ද නොව, විනාශ වුණු දේපල වල පාඩුව මෙතැකැයි කියා ගණන් බැලිය නොහැකි තරම් ය.

"නූතන මානව ඉතිහාසයේ ඉතා අඳුරු යුගයක්‌" (The Darkst Era in Modern Human History) නිර්මාණය කිරීමට මාවත විවර කර එයට නායකත්වය දුන් හිටලර් ගේ ජීවිතයේ අවසානය කොතැන දී කෙසේ සිදු වූවා දැයි යන්න තවමත් මුළු ලොවට ම ප්‍රශ්නයකි. එසේම අභිරහසකි. ඒ පිළිබඳව විවිධ මතිමතාන්තර රාශියකි. ඒ පිළිබඳව පර්යේෂණය කොට රචිත ග්‍රන්ථ ද රාශියකි. ඒ අතුරෙන් වඩාත් ම පර්යේෂණාත්මක ශාස්‌ත්‍රීය ග්‍රන්ථය වශයෙන් පිළිගැනෙන්නේ හිටපු ලෝප්‍රකට ඉතිහාසඥයකු වූ මහාචාර්ය හිHq ට්‍රේ‍රවෝර් රෝපර් ( Hugh Trevor- Roper) විසින් රචිත The Last Days of Hitler - 1947 නම් වූ ග්‍රන්ථය යි. මෙම ලිපිය රචනා වනුයේ එම මාහැඟි ග්‍රන්ථය ඇසුරු කර ගනිමිනි.

ඇඩොල්ෆ් හිට්‌ලර් ගේ සමීපතම සේවකයකු ගේ පාපොච්ඡාරණය

එය වූ කලී 1945 අප්‍රේල් මස 30 වැනි දිනය. එදින හරියටම ප.ව. 4.00 වන්නට විනාඩි 10 ක්‌ පමණ තිබිය දී ක්‍ෂණිකව බංකරය තුළින් ඇසුණු වෙඩි හඬකින් මා තිගැස්‌සීයත්ම, මගේ නාසය වෙඩි බෙහෙත් ගඳින් නැහැවිණි. එනම්, ඒ නායකතුමා ( එනම් ජර්මන් භාෂාවෙන් Fuehrere. - කර්තෘ ) වන හිට්‌ලර් සියදිවි නසාගෙන විය යුතුය. එවිට මා සිටගෙන සිටියේ බර්ලින් අගනුවර චාන්සලර් මන්දිරය පිහිටි භුමියෙහි විශේෂයෙන් ඉදිකර තිබුණු අධි ආරක්‍ෂිත බංකරයෙහි වූ සිතියම් කාමරයේ දොරටුව අසලය.

ඒ වන විටත් ළඟ ළඟින්ම, එනම් යාර 1500 ක්‌ පමණ වූ දුරකින් ඇසුණු සෝවියට්‌ රුසියානු රතු හමුදා ( Soviet Russian Red Army) සේනාංක විසින් තොරතෝංචියක්‌ නැතිව එල්ල කරන ලද මැෂින් තුවක්‌කු හා ෂෙල් වෙඩි ප්‍රහාරවලින් නැගුණු ගිඟුම් හඬින් බංකරයෙහි වූ නිහඬතාව වරින් වර බිඳී ගියේය. මට සිතීමට තරම් කාලයක්‌ නොවීය. සිත දැඩි කරගත් මම සැණෙකින් සිතියම් කාමරය තුළට දිව ගියෙමි. එවිට මගේ දෙනෙත මානයේ දර්ශනය වූයේ කිසිවිටෙකත් අදහාගත නොහැකි වූ දර්ශනයකි.

එනම් එහි වූ සෝපානයක්‌ මත විවේකීව හිඳගෙන සිටින්නා මෙන් වූ නායකතුමා ගේ ප්‍රාණය නිරුද්ධ වූ අප්‍රාණික සිරුරයි. මළ සිරුරේ නළලේ දකුණු පසින් කුඩා සිදුරකින් උණුසුම් ලේ ධාරාවක්‌ එක්‌ කම්මුලක්‌ දිගේ රූරා ගලා හැළෙමින් තිබුණි. ඔහුගේ දෙපා මුල කුඩා රිවොල්වරයක්‌ විය. ඊට යාබදව තවත් රිවෝල්වරයක්‌ ද බිම වැටි තිබුණි.

නායකතුමා ගේ මළ සිරුර පිටුපසින් වූයේ ඊට විනාඩි කීපයකට පමණ පෙරදී සියදිවි නසාගන්නට ඇතැයි කියා විශ්වාස කළ හැකි නායකතුමා ගේ පෙම්වතිය වූ ඊවා බ්‍රෝන් ගේ ( Eva Braun 1912-1945) මළ සිරුරයි. ඇය සුවසේ නිදා සිටින්නාක්‌ සේය. ඊවා සියදිවි නසා ගන්නට ඇත්තේ උග්‍ර විෂ සහිත පෙත්තක්‌ (මෙය උග්‍ර විස සහිත සයනයිට්‌ පෙත්තක්‌ විය හැකිය. - කර්තෘ) ගිල දැමිමෙන් යෑයි කියා විශ්වාස කළ හැකිය.

නායකතුමා සියදිවි නසාගන්නට පෙර තම ප්‍රියතම සුනඛයා වූ බොලොන්ඩ් (Blondi) නම් වූ ජර්මන් ෂෙෆර්ඩ් වර්ගයේ බැල්ලියට ද වස දි මරා තිබුණු අතර බංකරයෙහි ඇති දැඩි කළ තවත් ඉහත කී වර්ගයේම බල්ලන් දෙදෙනකුට ද වස දී මරා දමා තිබුණි. මෙම සිද්ධිදාමයෙන් හරියටම දින පහකට පමණ පෙර එනම්, 1945 අප්‍රේaල් මස 25 වැනි දින නායකතුමා මාව කිසියම් කටයුත්තක්‌ සඳහා සිතියම් කාමරය (මෙම සිතියම් කාමරය මීට මාසයකට පමණ පෙර සිට නායකතුමා විසින් තම කාර්යාල කාමරය වශයෙන් භාවිත කළේය.) වෙත කැඳවීය. සිතියම් කාමරය ට යාබදව වූයේ නායකතුමා ගේ යහන් කාමරය හා ඊවා මෙනවිය ගේ යහන් කාමරය යි. මෙම කාමර දෙකටම මඳක්‌ ඉදිරියෙන් වූයේ මගේ කාමරය යි.

මා සිතියම් කාමරය වෙත යන විට නායකතුමා ඉතා හැඟුම්බර මුහුණෙන් යුතුව පිළියමක්‌ මෙන් හිටගෙන සිටියේය. එතුමා තම කටහඬ අවධි කොට මා විසින් නුදුරු දිනයකදී විශේෂ නියෝගයක්‌ ක්‍රියාත්මක කළ යුතු බව දන්වා සිටියේය. එනම්, ඒ නුදුරු දිනයකදී තමා ඊවා සමගින් සියදිවි නසාගන්නට යන බවත් ඉන් ඉක්‌බිතිව මළ සිරුර දෙක කිසිවෙකුටවත් හඳුනාගත නොහැකි වන පරිදි පුළුස්‌සා දැමිය යුතු බවත් ය.

තවදුරටත් කතා කළ නායකතුමා සිතියම් කාමරයේ වූ සියලුම ලිපි ලේඛන හා තමාගේ සියලුම ඇඳුම් පැළදුම් පුළුස්‌සා දැමිය යුතු බවත් එක්‌ දෙයක්‌ පමණක්‌ පුළුස්‌සා නොදැමිය යුතු බවත් තරයේ කියා සිටියේය. එනම්, ඒ නායකතුමා ගේ ලියන මේසය එපිටින් වූq බිත්තියේ ඉහළ එල්ලා තිබුණු 1 වැනි විලියම් පෙඩ්රික්‌ රජුගේ ( William Federick 1713-1740 ) පින්තුරය යි.

(නායකතුමා බර්ලින් අගනුවරින් කිසි විටෙකත් පලා නොයන බවත් එතුමාගේ අභිප්‍රාය වනුයේ බර්ලින් අගනුවරදීම මිය යැමට බවත් මම මුල සිටම දැන සිටියෙමි.)

නායකතුමාගේ ජීවිතයේ අවසාන මොහොත උදාවන්නට පෙර ගෙවී ගිය ඒ දස දින තුළ බංකරයෙහි නායකතුමා ගේ පෞද්ගලික ජීවිතය හා බැදුණු සුවිශේෂ උත්සව දෙකක්‌ පැවැත්විණි. එනම්, ඒ 1945 අප්‍රේල් මස 20 වැනි දින නායකතුමා ගේ පනස්‌හය වැනි ( 56 ) උපන් දිනය ( එනම් 1889.04.20/ 1945.04.20 ) සමරනු පිණිස පවත්වන ලද උපන් දින උත්සවය යි. 1945 අප්‍රේල් මස 29 වැනි දින බංකරයෙහි පවත්වන ලද්දේ නායකතුමා ගේ හා එතුමා ගේ පෙම්වතිය වූ ඊවා අතර වූq නිත්‍යානුකුල විවාහ මංගල්‍යය වෙනුවෙන් පවත්වන ලද උත්සවය යි. මෙම විවාහ මංගල්‍යය උත්සවය නායකතුමා විසින් එදින රාත්‍රියේ පවත්වන ලද්දේ තම පෙම්වතිය ගේ බලවත් ආශාව මුදුන්පත් කරනු පිණිස ය. මක්‌නිසාදයත් ඒ ඊවා සියදිවි නසා ගැනීමට මොහොතකට හෝ කලින් නායකතුමා ගේ නීsත්‍යානුකුල බිරිඳ වීමට මහත් සේ ආශාවක්‌ දැක්‌ වූ බැවිනි. (එදින රාත්‍රියේ බංකරය තුළ පවත්වන ලද මෙම විවාහ මංගල්‍යය වෙනුවෙන් සාක්‍ෂිකරුවන් වශයෙන් අත්සන් කරන ලද්දේ නාසි ජර්මනියේ උප අගමැතිවරයා වූ මාර්ටින් බෝර්මන් (Martin Bormann) නාසි ජර්මනියේ ප්‍රචාරක අමාත්‍යවරයා වූ ආචාර්ය ජෝශප් ගොබෙල්ස්‌ (Dr.Joseph Goebles 1897 - 1945 ) ය.

නායකතුමා ගේ මළ සිරුර පොරෝනයකින් ඔතාගත් මම බංකරය තුළ නායකතුමා ගේ ආරක්‌ෂාව සඳහා සිටි භටයන් (විශේෂ හමුදා සේනාංකය වූ කලී, ඇඩොල්ෆ් හිට්‌ලර් විසින් තම විශේෂ කටයුතු සඳහා ද, සුවිශේෂී පුද්ගලයන් පැහැර ගැනීම සඳහා ද, යුදෙව් වධක කඳවුරුවල සේවය කිරීම සඳහා ද එමෙන්ම සමූහ මිනිස්‌ ඝාතන සඳහා ද භාවිතා කරන ලද විශේෂ හමුදා ඒකකයකි. - කර්තෘ) දෙදෙනෙකු ගේ උදව්වෙන් එය ඔසවාගෙන එළියට ගියෙමි. ඊවා ගේ මළ සිරුර තවත් නිලධාරියෙකු විසින් ඔසවාගෙන එළියට රැගෙන යන ලදී. නායකතුමා සම්පුර්ණ නිල ඇදුමින් සැරසී සිටි අතර ඊවා සුදු පැහැති තිත් වැටුණු නිල් පැහැති ගවුමකින් සැරසි සිටියාය. ඇය ගේ අතෙ හි වූයේ නායකතුමා විසින් ඇයට තෑග්ගක්‌ වශයෙන් පිරිනමන ලද දියමන්ති ඔබ්බවන ලද ෆ්ලැටිනම් අත් ඔරලෝසුව යි.

සෝවියට්‌ රුසියානු රතු හමුදා සේනාංක විසින් දිගින් දිගටම එල්ල කරන ලද මැෂින් තුවක්‌කු හා ෂෙල් වෙඩි ප්‍රහාර දැන් බර්ලින් අගනුවර සීමාවට ආසන්නවම ඇසෙන්නට වූයෙන් නායකතුමා මට දුන් නියෝගය දැන් මවිසින් නොපමාව ක්‍රියාත්මක කළ යුතුව ඇත.

මෙම විශේෂ කාර්යය වෙනුවෙන්ම සුදානම් කරන ලද පෙට්‌රල් කෑන් කීපයක්‌ම මවිසින් මළ සිරුර මතට වත්කරන ලදී. ඉන් ඉක්‌බිතිව ගිනි තබන ලද අතර ඉන් මහා ගිනි ජාලාවක්‌ බුර බුරා අහසට නැගුණි. එහෙත් ස්‌වල්ප වේලාවකින් ඒ මහා ගිනි ජාලාව ක්‍රමක්‍රමයෙන් නිවී යන්නට ද විය. නායකතුමා ගේ නියෝගය වූයේ තමා ගේ හා ඊවා ගේ මළ සිරුරු මුළුමනින්ම දවා අළු කළ යුතුය යන්න යි. මෙම පෙට්‍රල් කෑන් කීපයෙන් මළ සිරුර දවාලීමෙන් ඉක්‌බිතිව වූවද නායකතුමා හා එතුමා ගේ මනාලිය යමෙකුට හඳුනා ගැනීමට එතරම් අපහසු නොවීය. අපට තවත් කළ හැකි කිසිවක්‌ ඉතුරු නොවීය.

දින කිහිපයකින් සෝවියට්‌ රුසියානු රතු හමුදා සේනාංකයක්‌ විසින් මා අත්අඩංගුවට ගන්නා ලදී. ඉන් ඉක්‌බිතිව සිරගත කරන ලද මගෙන් ඔවුන් දීර්ඝ ලෙස ප්‍රශ්න කරන ලදී. ඔවුන්ගේ ප්‍රධාන ප්‍රශ්න කිරිම වූයේ නායකතුමා ගේ මළ සිරුර වළ දමන ලද ස්‌ථානය පිළිබදවය. මා සිතු එම ස්‌ථානය වෙත මවිසින් ඔවූන් කැදවාගෙන යන ලදි. එම ස්‌ථානය පෙන්වීමෙන් වූවද ඔවුනට එතැන පිළිබදව කිසිදු විශ්වාසයක්‌ නොවීය. තවත් අවුරුදු කිහිපයක්‌ ගතවන තුරුම ඒ පිළිබඳව ඔවුන් මගෙන් දීර්ඝ ලෙස ප්‍රශ්න කළ අතර එයින් ගම්‍ය වනුයේ සෝවියට්‌ රුසියනු රතු හමුදාවට තවමත් මළ සිරුරු වළ දමන ලද ස්‌ථානය සොයා ගැනිමට නොහැකි වු බවයි. මගේ විශ්වාසය වනුයේ බර්ලින් අගනුවර චාන්සලර් මන්දිරය පිහිටි භුමියෙහි කොතැනක හෝ භටයන් විසින්ම එම මළ සිරුර වළ දමා ඇති බවයි. එනමුත් එය මගේ විශ්වාසයක්‌ පමණි. ඇතැම්විට නායකතුමා හා එතුමා ගේ මනාලිය වූ ඊවා බ්‍රෝන් අවට තැණුනු සමූහ මිනීවළක්‌ තුළ සාමදානයෙන් සැතපී සිටිනවා විය හැකියි.

ඇඩොල්ෆ් හිටලර් විසින් දෙවැනි ලෝක යුද්ධයේ දී ආක්‍රමණය කොට මුළුමනින්ම යටත් කරගන්නා ලද රටවල් පිළිවෙලින් මෙසේ ය.

'This is the last territorial demand I have to make in Europe... I further assured him (Chamberlain) and I repeat here that if this problem is solved there will be no further territorial problems in Europe for Germany'

Hitler, Speech at the Sportspalast, Berlin, September 26, 1938



විශේෂ සටහන

මෙම පාපොච්චාරණය වූ කලී ඇඩොල් හිට්‌ලර් ගේ විවාදාත්මක මරණය පිළිබඳව මෙතෙක්‌ හමු වී ඇති වඩාත්ම විශ්වාසනීය හා සත්‍යය සාක්‍ෂිය බව නූතන ඉතිහාසඥයන් ගේ හා යුද විශ්ලේෂකයන් ගේ මතයයි. එපමණක්‌ ද නොව හිට්‌ලර් ගේ ජීවිතය හා සම්බන්ධව මෙතෙක්‌ රචනා කර ඇති බොහෝමයක්‌ චරිතාපදානයන්හි ද නිර්මාණය වී ඇති වෘත්තාන්ත චිත්‍රපටි හා වාර්තා චිත්‍රපටියන්හි ද අවසානය සනිටුහන් වන්නේ මෙම පාපොච්චාරණය පදනම්ව, එනම් හිට්‌ලර් තමාගේ අධි ආරක්‍ෂිත බංකරය තුළදී සියදිවි නසාගත්තා යන්න තවදුරටත් සනාථ කරමිනි.

එසේම මවිසින් මෙම ලිපිය රචනා කිරීමට පෙර ඇඩෝල්ෆ් හිට්‌ලර් ගේ ජීවිතය හා සම්බන්ධව රචිත මගේ පෞද්ගලික පුස්‌තකාලයෙහි වූ මුල්පෙළේ කෘතීන් කිහිපයක්‌ ද මගේ පෞද්ගලික චිත්‍රපට එකතුවෙහි වූ විශිෂ්ටගණයේ වෘත්තාන්ත චිත්‍රපට කිහිපයක්‌ හා වාර්තා චිත්‍රපටි කිහිපයක්‌ ද ආශ්‍රය මිශ්‍රය කරන ලදී. පාඨක ඔබගේ වැඩිදුර පරිශිලනය පිණිස ඒවා පිළිවෙලින් මෙසේ දක්‌වමි.

ඇතිපොළ මංගල හිමි
-Divaina-

ග්‍රන්ථ

1. Adolf Hitler - By James Bunting -1980

2. Adolf Hitler - By Laurence Rees - 2012

3. Hitler - By Norman Stone - 1977

4. Hitler - The Man and the Miltary Leader - Percy Ernst Schramm - 1982

වෘත්තාන්ත චිත්‍රපටි

1. Downfall - 2004

2. Hitler - The Rise of Evil - 2003

වාර්තා චිත්‍රපට

1. Hitler in Caeer -1976

2. Hitler in Colour - 2005

3. World at War - 1973

4. World war II in Colour - 2010

වෛද්‍ය ඩැනිස්ටර් එල්. පෙරේරා

බොහෝ දෙනා නොදන්නා නමුත් වරකා යනු සුව කිරීමට නොහැකි රෝගී තත්ත්වයන් කිහිපයක්ම සමනය කිරීමට හැකියාවක් ඇති පලතුරකි. බොහෝ දෙනා හරිහැටි නොහඳුනන වරකාවල ගුණාත්මක භාවය මෙන්ම එහි ඇති ඖෂධීය වැදගත්කම පිළිබඳ සැකසෙන මෙම ලිපිය ආයුර්වේද වෛද්‍ය ඩැනිස්ටර් එල්. පෙරේරා සමග කළ සාකච්ඡාවක් ඇසුරෙන් ලියැවේ.

ඈත අතීතයේ සිටම කොස් ශ්‍රී ලාංකික ජන සමාජය තුළ ‍පොදුවේ සියලු දෙනාම ප්‍රිය කළ ආහාරයකි. මෙය ඈත අතීතයේ සිටම බත් සඳහා විකල්පයක් ලෙස භාවිත කළ බැවින් බත් ගස ලෙසින් ලාංකේය සමාජයේ ගෞරවයට පාත්‍ර වූ ආහාරයකි. ව්‍යංජනයක් ලෙස මෙන්ම තම්බා ආහාරයට ගත හැකි කොස් ඉඳුන පසු රසවත් පලතුරකි. ඉඳුණු කොස් ගෙඩියේ මෘදු මදුලු සහිත වර්ගය වැල වශයෙන්ද මදක් ඝනකමින් වැඩි මදුලු සහිත ප්‍රභේදය වරකා වශයෙන් අප හඳුන්වයි.

එමෙන්ම වැල යනු කොස්ගසෙහි ස්ත්‍රී ශාකයේ ඉඳුණු මදුලු ලෙසත් වරකා යනු පුරුෂ ශාකයේ ඉඳුණු මදුලු ලෙසත් ජනප්‍රවාදයේ පැවැසේ.

වැල සහ වරකා රසයෙන්, සුවඳෙන් හා ස්වභාවයෙන් වෙනස්ය. එහෙත් ‍පෝෂණ ගුණයෙන් මේ දෙවර්ගය එක සමාන වේ. කොස් වාතය ප්‍රකෝප කරන ආහාරයක් වශයෙන් ප්‍රකට වුවද වැල සහ වරකා වාතය හා පිත සමනය කිරීමට සමත් ආහාරයකි. එහෙත් සවස් කාලයේදී වැල සහ වරකා ආහාරයට ගැනීම නුසුදුසුය.

ඒ බැව් ශ්‍රී ලාංකික ජන සමාජය තුළ ප්‍රචලිතය. එයට හේතුවන්නේ හවස් කාලයේදී වැල සහ වරකා ආහාරයට ගැනීමෙන් එමගින් ඒවා අජීර්ණ වීමට ඇති ඉඩකඩ වැඩිවීමය. එබැවින් වැල සහ වරකා ආහාරයට ගැනීමට සුදුසු වන්නේ දහවල් කාලයේදීය. එලෙස ආහාරයට ගැනීමේදී එයට ලුණු හා ගම්මිරිස් ස්වල්පයක් එක් කර ආහාරයට ගැනීම වඩාත් සුදුසුවේ. එමගින් උදරාබාධ ඇතිවීමෙන් වැළකිය හැකිය.

වරකා බංගල්දේශයේ ජාතික පලතුර ලෙස නම්කර ඇත. තන්තු බහුල ආහාරයක් වන ‍පොටෑසියම්, මැග්නීසියම්, කැල්සියම්, යකඩ, ඛනිජ ලබන, විටමින් බි, විටමින් ඒ සහ විටමින් ඕ6 වැනි ‍පෝෂ්‍ය පදාර්ථ ගණනාවකින් ‍පොහොසත් පලතුරකි. එමෙන්ම විටමින් ඕ සංකීර්ණයේ ‍පෝෂ්‍යපදාර්ථ බොහොමයක් අඩංගු පලතුරකි.

වරකා මදුලු කෝප්පයක් ගත හොත් එහි කැලරි 155 ක් පමණ ප්‍රමාණයක් ඇත. එමෙන්ම වරකා වල සුක්රේස්, ෆ්රුක්ටෝස්, ග්ලූකොස් යන සීනි වර්ගයන් අඩංගුය.

පුද්ගලයකුට ෙදෙනික අවශ්‍ය විටමින් අවශ්‍යතාවයෙන් 25 ක් හා 11 තන්තු ප්‍රමාණයක් වරකා මදුලු කෝප්පයක අඩංගුය. එබැවින් වරකා ‍පෝෂණ ද්‍රව්‍ය වලින් අනූන ආහාරයකි.

විශේෂයෙන්ම වරකා සම්බන්ධයෙන් මෑතකදී කරනලද පර්යේෂණ වලින් තහවුරු වී ඇත්තේ වරකා
පිළිකා මර්දනය කිරීමට හැකියාවක් ඇති පලතුරක් වන බවයි. විශේෂයෙන්ම අන්ත්‍රවල ඇති වන පිළිකා මර්දනයට සමත් ආහාරයක් ලෙස ඇමෙරිකාවේ ජාතික පිළිකා ආයතනය කරන ලද පරීක්ෂණවලදී තහවුරු වී ඇත.

වරකා තුළ පිළිකා මර්දනය කිරීමට හැකියාවක් ඇති විශේෂ සංයෝග කිහිපයක් අඩංගුය. අයිසෝප්‍ලේවින්ස් ලිග්නැන්ස් නමැති ප්‍රතිපිළිකා සංයෝග වලින් අනූන වරකා ආහාරයට ගැනීම මගින් පිළිකා වලට (විශේෂයෙන් අන්ත්‍රවලට) එරෙහිව ක්‍රියාත්මක විය හැකි බව සොයාගෙන ඇත.

එමෙන්ම වරකාවල අඩංගු සැ‍පොනින් නම් සංයෝගය මගින් පිළිකා ෙසෙලවල බන්ධනයක් ඇති කර එම ෙසෙල වර්ධනය අඩාල කරගත හැකි බව වරකා සම්බන්ධයෙන් කරන ලද නව්‍යතම විද්‍යාත්මක පර්යේෂණ මගින් සොයාගෙන ඇත. එමෙන්ම වරකාවල අඩංගු සැ‍පොනින් සංයෝගය නිසා ලියුකේමියා ෙසෙල සමග යම් ආකාරයකට සටන් කිරීමට හැකියාවක් ද ඇති බව සොයාගෙන ඇත.

වරකා ආහාරයට ගැනීමෙන් ඊස්ට්‍රජන් හෝමෝනය මගින් ලැබෙන ආරක්ෂාවට සමාන ආරක්ෂාවක් කාන්තාවන්ගේ සෞඛ්‍යයට ලැබෙන බවද මෑතකදී කරන ලද විද්‍යාත්මක පර්යේෂණ මගින් සොයාගෙන තිබිම විශේෂත්වයකි. මේ හෙයින් වරකා කාන්තාවන්ගේ සෞඛ්‍යයට ඉතා ප්‍රතිඵලදායි ‍පෝෂ්‍යදායී ආහාරයකි. වරකා වල අඩංගු ප්‍රතිඔක්සිකාරක සංයෝග මගින් ‍පොදුවේ සියලුම පිළිකාවලට එරෙහිව සටන් කිරීමට හැකියාවක්ද ඇති බව විද්‍යාත්මකව කරන ලද පර්යේෂණවලදී සොයාගෙන ඇත.

වරකා ආහාරයට ගැනීමෙන් ආමාශය මහබඩවැල්, කුඩා බඩවැල් වැනි ඉන්ද්‍රියයන්හි වියළි ස්වභාවය අඩුකර තෙත් ස්වභාවයක් ඇති කර එම ඉන්ද්‍රියයන් පිරිසිදු කිරීමේ හැකියාවද ඇතිවේ. වරකා මදුලු වල ඇති තන්තු බහුල බව නිසා මල බද්ධය නැති කර මල පිටවීම හොඳින් සිදු කර ගැනීමට හැකිවේ. ශරීරය ශක්තිමත් වීමට අක්මාව ශක්තිමත්වීමට හා හමේ පැහැපත් බවක් ඇති කර ගැනීමට මෙන්ම කිරිමව්වරුන්ගේ කිරි පිරිසිදු කර ගැනීමට මතක ශක්තිය හා ධාරණ ශක්තිය වර්ධනය කර ගැනීමට වරකා ආහාරයට ගැනීමෙන් හැකිවේ.

ගැබිනි සමයේ වරකා ආහාරයට ගැනීමෙන් දරු ප්‍රසූතිය පහසුවන අතර දරුවන් නොමැතිව පීඩාවට පත්වන අඹුසැමි යුවළකට මඳසරුභාවයට පිළියමක් ලෙස යම් සහනයක් ලබා ගැනීමට වරකා ආහාරයට ගැනීමෙන් හැකිවේ. විශේෂයෙන් පුරුෂයන්ගේ ශුක්‍රාණු වර්ධනය කිරීමට ද සමත් ආහාරයකි.

වරකාවල හා වැල සුගන්ධය එහි අඩංගු විශේෂිත වූ රසායනිකයක් මගින් ඇතිවේ. වරකා ප්‍රභේද කිහිපයකි. ඒවා පැණි වරකා, ගිනි වරකා ආදී වශයෙන් දැක ගත හැකිය. ගිනි වරකා රතු පැහැයට හුරු තැඹිලි පැහැයෙන් යුත් වරකා මදුලු වලින් යුක්තවේ. පැණි වරකා ඉතාම පැණිරසයෙන් යුත් රසවත් බවෙන් වැඩි ආහාරයකි.

වරකා මදුලු පමණක් නොව වරකා ගසේ කොළ, ‍පොතු, මුල් හා වරකා මදුලු වල කොහොල්ලෑ ද විවිධාකාරයේ රෝගී තත්ත්වයන් කිහිපයක් සඳහාම මහඟු ඖෂධයකි.

චමිලා අල්විස්
-Lakbima-

මැංගුස් ගෙඩි මේ දිනවල සුලබ දසුනක් බවට පත්වෙලා බලන්නත් ලස්සනයි. ලස්සන වගේම එහි පවතින ගුණ පිළිබඳ බොහෝ දෙනෙක් නොදන්නවා විය හැකියි.

මැංගුස්වල ජලය ග්‍රෑම් 80.94ක්, ප්‍රෝටීන් ග්‍රෑම් 41ක්, මේදය ග්‍රෑම් 0.58ක්, කාබෝහයිඩ්‍රේට් ග්‍රෑම් 17.91ක් සහ තන්තුමය කොටස් ග්‍රෑම් 1.8ක් අඩංගු වෙනවා. ඒ වාගේම මිනිස් සිරුරට අත්‍යවශ්‍ය පෝෂ්‍ය පදාර්ථ වන කැල්සියම් මිලිග්‍රෑම් 12ක්, යකඩ මිලිග්‍රෑම් 0.30ක්, මැග්නීසියම් මිලිග්‍රෑම් 13ක්, පොස්පරස් මිලිග්‍රෑම් 8ක්, පොටෑසියම් මිලිග්‍රෑම් 48ක්, සෝඩියම් මිලිග්‍රෑම් 7ක් සහ සින්ක් මිලිග්‍රෑම් 0.21ක් අන්තර්ගතයි.

මැංගුස්වල අන්තර්ගත ප්‍රතිඔක්සිකාරක ගුණය හේතුවෙන් මිනිස් සිරුරෙහි වියපත් බව දුරලමින් තරුණ බව රුකගැනීමට උපකාර කරයි. එහි අඩංගු සංතෘප්ත මේදය හේතුවෙන් සිරැරේ කොලෙස්ටරෝල් ප්‍රමාණය මනාව පවත්වා ගැනීමට පුළුවන.

මැංගුස් ග්‍රෑම් 100ක අඩංගු වන්නේ කැලරි 63ක් වැනි ප්‍රමාණයකි. එම නිසා මිනිස් සිරැරේ අන්තර්ගත මේද ප්‍රමාණය මැංගුස් ආහාරය ගැනීමෙන් පාලනය කරගත හැකිය. ස්ථුලතාවයෙන් දුක් විඳින පුද්ගලයන්ට මැංගුස් ආහාරයට ගැනීමෙන් තම ශරීර බර අඩුකර ගැනීමට පුළුවන. මැංගුස් ග්‍රෑම් 100කින් මිනිස් සිරැරට අත්‍යවශ්‍ය විටමින් සී 12%ක් පමණ ලබාගත හැකි බව වෛද්‍යවරු පෙන්වා දෙති. රතු රුධිර සෛල වර්ධනය කර ගැනීමට මැංගුස් ආහාරයට ගැනීමෙන් හැකියාව ඇත. රුධිර නාළවල ධමනි හීනිවීමේ තත්ත්වය මඟහරවා ගැනීමටද, මැංගුස් වඩාත් උචිත පළතුරකි.

මැංගුස් මගින් මිනිස් සිරුරේ ප්‍රතිශක්තිකරණ පද්ධතිය යහපත්ව ක්‍රියාත්මක කරලීමට හැකිය. එමගින් රෝග වළක්වා ගැනීමට ද හැකි වේ. මැංගුස්වල අන්තර්ගත තඹ, මැග්නීසියම්, ඛනිජ ලවණ හා පොටෑසියම් නම් වූ පෝෂ්‍ය පදාර්ථ මගින් අධික රුධිර පීඩන තත්ත්ව වළක්වාගත හැකිය. එසේම හෘද ස්පන්ධනය මනාව පාලනය කර ගැනීමට පුළුවන.

මැංගුස්වල අඩංගු විටමින් සී හේතුවෙන් ඇසේ ඇතිවන සුද තත්ත්වය වළක්වාගත හැකි බව වෛද්‍යවරු ප්‍රකාශ කරති. දේශීය වෛද්‍යවරුන් ද, මැංගුස් මදය පමණක් නොව, එහි ලෙල්ල තම වෛද්‍ය ප්‍රතිකාර සඳහා යොදා ගනු ලැබේ. මැංගුස් ලෙලි හා ලෙලිවල වියළි කුඩු අතීසාරයට ගුණදායකය. එපමණක් ද නොව, ඔසප් සිදුවීමේදී ඇතිවෙන වේදනා මඟහරවා ගැනීමටද මැංගුස්වලින් විවිධ දේශීය බෙහෙත් වර්ග පිළියෙල කරනු ලබයි. මැංගුස්වල කොළ සහ පොතු මගින් මිනිස් සිරුරේ උෂ්ණත්වය පාලනය කිරීම සඳහා බෙහෙත් වට්ටෝරු සාදනු ලැබේ.

මැංගුස් ආහාරයට ගැනීමෙන් මුහුණේ ඇතිවන කුරුළෑ වැනි ආසාදන තත්ත්ව අවම කර ගැනීමට පුළුවන. විවිධ චර්ම රෝග සුවවීම වේගවත් කරන අතරම, සෛල අලුත්වැඩියා කිරීමේ හැකියාව ද මැංගුස්වල පවතී.

මෙහි අඩංගු xanthones නමැති සංඝටකය හේතුවෙන් මිනිස් සිරුරට බලපාන දිලීර, වෛරස් ආසාදන තත්ත්ව වළක්වා ගැනීමට පුළුවන. පිළිකා රෝග සඳහා ද මැංගුස් ඉතාමත්ම ගුණදායක පළතුරකි. වෛද්‍යවරුන් ප්‍රකාශ කරන අන්දමට, ගර්භණී සමයේදී මැංගුස් ආහාරයට ගැනීම එතරම් ගුණදායක නොවේ.

ප්‍රතිඔක්සිකාරකයක් වීම

විවිධ විද්‍යාත්මක පර්යේෂණයන්ට අනුව මැංගුස් සතුව වර්ග දෙකක “xanthones” වන “alpha mangosteen” සහ “gamma mangosteen” යන සංයෝග අන්තර්ගත වන බව සොයාගෙන තිබෙනවා. “xanthones” මගින් ශරීරයේ දැවිල්ල වැනි තත්ත්වයන් සමනය කිරීම ඇතුළුව විවිධ වර්ගයේ හෘද රෝග සුවපත් කරන බවත් අධ්‍යයනයන් විසින් තහවුරු කර තිබෙනවා. ප්‍රතිඔක්සිකාරක බලයන්ද වන මෙම සංයෝග මගින් විවිධ රෝග කාරක නිසා ශරීරයේ හානි වූ සෛල සුවපත් කිරීම, අකලට ශරීරය වියපත් වීම වැළැක්වීම, ආහාර ජීර්ණ පද්ධතිය ආශ්‍රිත රෝග සමනය කිරීම සහ කායික, මානසික සෞඛ්‍ය වර්ධනය කිරීම පවා මැංගුස් මගින් සිදු කරනවා.

කැලරි අවම වීම

කැලරි සහිත ආහාර තෝරා බේරා ආහාර ලබාගන්නා අයට මැංගුස් කදිම පළතුරක්. මැංගුස් තුළ අන්තර්ගත වන්නේ කැලරි ඉතා අඩු අගයක්. (මැංගුස් ග්‍රෑම් 100ක් තුළ කැලරි 63ක් අන්තර්ගත වෙනවා) ඒ වගේම, මැංගුස් සතුව සංතෘප්ත මේදය සහ කොලෙස්ටරෝල් සුළු ප්‍රමාණයක්වත් අන්තර්ගත වන්නේ නෑ. එපමණක් නොවෙයි, මැංගුස් තන්තුවලින්ද පොහොසත් පළතුරක් වනවා. (ග්‍රෑම් 100ක් තුළ 13%ක් පමණ) ශරීරයේ බර පාලනය කිරීමට උත්සාහ කරන්නන් සඳහාත් මැංගුස් ඉතා උසස් පළතුරක්.

විටමින් C

මැංගුස් විටමින් C වලින් පොහොසත් පළතුරක්. (ග්‍රෑම් 100ක් තුළ විටමින් C 12%). ජලයේ දියවන ප්‍රතිඔක්සිකාරකයක් වන මෙම විටමින් C සෙම්ප්‍රතිශ්‍යාව වැනි රෝගවලින් අපව ආරක්‍ෂා කරන අතර වෙනත් රෝග කාරකවලින්ද අපව ආරක්‍ෂා කරනවා. විටමින් C සපිරි මැංගුස් ආහාරයට ගැනීම මගින් ශරීරයේ නව සෛල වර්ධනයත් ඇති කරනු ලබනවා. ගර්භණී සමයේදී කාන්තාවකට මේ ආකාරයේ විටමින් C අතිශය වැදගත් වන අතර කපාටක රෝග සඳහාත් මැංගුස් ඉතා හොඳ ඖෂධයක් වනවා.

රුධිරය සංසරණය

මැංගුස් මගින් ශරීරයේ රතු රුධිර සෛල වර්ධනය කරන අතර රක්තහීනතාවය දුරු කරනවා. රුධිර නාලිකා ශක්තිමත් කර රුධිර සංසරණයත් නිසි ලෙස සිදුකිරීමට මැංගුස් තුළ අන්තර්ගත වන සෞඛ්‍ය සම්පන්න සංඝටක දායක වනවා. මැංගුස් සුලබව ආහාරයට ගැනීම මගින් තියුණු පපුවේ වේදනාව, අධික කොලෙස්ටරෝල් මට්ටම, “atherosclerosis” සහ හදවතේ රුධිර නාලිකා සිරවීම වැනි රෝග සුවපත් කර ගන්නට පුළුවන්.

මැංගුස් ආහාරයට ගැනීම මගින් ඇසට සිදුවන රුධිර සංසරණය නිසි ලෙස සිදුවීම නිසාත් විටමින් C නිසි ලෙස ශරීරයට සැපයීම නිසාත් “cataracts” වැනි අක්‍ෂි රෝග (මෙය ඇසේ කාචයේ විනිවිද පෙනෙන ස්වභාවය වැඩිවීම නිසා පෙනීම බොඳවන රෝගයක්) වලින් පහසුවෙන්ම ආරක්‍ෂා වන්නට පුළුවන්.

අනවශ්‍ය කොලෙස්ටරෝල් මට්ටම අඩු කිරීම

මිනිස් ශරීරයේ අන්තර්ගත වන අහිතකර කොලෙස්ටරෝල් මට්ටම නිසි ලෙස අඩුකර හදවතේ නිසි ක්‍රියාකාරීත්වය රැකගන්නට මැංගුස් ජීවක ඔසුවක් වනවා.

Tuberculosis ක්ෂය රෝගය

මැංගුස් සතු බැක්ටීරියා නාශක බලයන් සහ දිලීර නාශක බලයන් මගින් ප්‍රතිශක්තිකරණ පද්ධතිය වර්ධනය කිරීමත් “Tuberculosis” වැනි බැක්ටීරියා නිසා පෙනහල්ල තුළ ඇතිවන රෝග නැසීමත් සිදු කරනවා.

පිළිකාව

පිළිකාව පාලනයට සමත් වන්නේ මැංගුස් තුළ අන්තර්ගත වන ප්‍රතිඔක්සිකාරක බලයයි.

රුධිර පීඩනය

මැංගුස් සතු කොපර්, මැන්ගනීස් සහ මැග්නීසියම් යන ඛනිජ වර්ග මගින් හදගැස්ම සහ රුධිර පීඩනය නිසි ලෙස පවත්වා කිරීටක හදවත් රෝග සහ ආඝාතය වැනි දරුණු රෝගී තත්ත්වයන්වලින් ආරක්‍ෂා කිරීමක් සිදු කරනවා.

වේදනා නාශක බලය ඖෂධ පානය කිරීම මගින් සුව කළ නොහැකි සයට්කා වේදනාව මැංගුස් තුළ අඩංගු වන වේදනා නාශක බලය විසින් සුව කරනු ලබනවා. ඔබත් සයට්කා වේදනාව වැනි ශරීර වේදනාවලින් පසුවන පුද්ගලයෙක් නම් දිනකට දෙතුන් වතාවක් මැංගුස් ආහාරයට ගන්න. ඔබේ ශරීර වේදනාවන් සුවපත් වේවි.

“Alzheimer’s” රෝගය

“Alzheimer’s” රෝගය යනු මොළයේ පරිහානිය නිසා ඇතිවන මානසික රෝගී තත්ත්වයක්. මෙම රෝගයේ රෝග ලක්‍ෂණ වන්නේ ව්‍යාකූල බව, වික්ෂේපය සහ කරුණු මතකයෙහි රඳවා තබාගැනීම අපහසු වීමයි. මැංගුස් ආහාරයට ගැනීම මගින් ලැබෙන තවත් වටිනා සෞඛ්‍ය වාසියක් වන්නේ “Alzheimer’s” රෝගය සුවපත් වීමයි.

විදුරුමස්වල ඇතිවන ආසාදන දුරලීම

මැංගුස් ආහාරයට ගැනීමෙන් “periodontitis” වැනි විදුරුමස් ආසාදනයන් සුවකර ගන්නටත් පුළුවන්.

ඔසප් වේදනා සමනය කිරීම

කාන්තාවකට ඔසප් වීමක් ආසන්න වන විට හිස කරකැවිල්ල, මනෝභාවය වෙනස් වීම, රුධිර පීඩනය වැඩිවීම වැනි විවිධ පීඩාකාරී ලක්‍ෂණ මතු වනවා. මැංගුස් මුල මගින් මෙවන් ඔසප් වේදනා සමනය කරන බවට මැලේසියාවේ සිදුකරන ලද එක්තරා අධ්‍යයනයක් මගින් තහවුරු කර තිබෙනවා.

උදරාබාධ සුව කිරීම

මැංගුස් විශාල ලෙස වගා කරන රටක් තමයි පිලිපීනය. ඔවුන් මැංගුස් උදරය ආශ්‍රිත රෝග සුව කිරීම සඳහා නිතරම භාවිත කරනවා. ඔවුන් මේ සඳහා වැඩි වශයෙන් භාවිත කරන්නේ මැංගුස් ශාකයේ පත්‍රයි. මැංගුස් පත්‍ර භාවිතයෙන් පාචනය, බඩවැල් තුළ හටගන්නා “dysentery” රෝගය සහ මුත්‍රා රෝග සුව කරනු ලබනවා.

වියපත් වීම පාලනය

මැංගුස් සතු “catechin” වැනි ප්‍රතිඔක්සිකාරක මගින් ශරීරය අකලට වියපත් වීම වළකා තරුණ පෙනුම රැක දෙනවා.

ශක්තිය වර්ධනය කිරීම

ඔබව ප්‍රබෝධමත් කර මුළු දවසම ශක්තිමත්ව තැබීමට මෙම පළතුරට හැකියාව තිබෙනවා. මෙහි අඩංගු වන පෝෂණ ගුණය නිසයි ශරීරය ප්‍රබෝධමත් කර ශක්තිය වර්ධනය කරනු ලබන්නේ.

Deshaya-

පුරා මාස තුනකට ආසන්න කාලයක් ‘රසවිත’ හරහා ඔබට කොටස් දොළහකින් යුතුව සවිස්තරව ගෙනා කැලණි ගඟේ උපත සොයා යන ගමනේ අවසාන සනිටුහන් කරන වාර්තාව මෙයයි.ඔ කල්‍යාණිය දියඹ සිප ගන්නා මෝදර මෝය කටේ සිට ගඟට සමාන්තරව ගම් නියංගම්, මං මාවත්, වතුයායන් අතරින් දින කිහිපයක් පුරාවට සිදුකළ ගවේෂණාත්මක වාර්තාකරණයේ අවසන් නිගමනය සමඟින් කැලණි නදියේ සැබෑ උපත සොයා අපි වන රක්‍ෂිතවලට ගොඩ වැදුණෙමු.

පසුගිය සතියේ අප අවසන් කළේ මස්කෙළිය ඔයට උපත දෙන මා උස්සාකැළේ ජලාශය සහ එය පෝෂණය කරන සමනල රක්‍ෂිතයේ ජල පෝෂක ඉසව් පිළිබඳ සවිස්තරව තොරතුරු ගෙන හැර පාමිනි. පොල්පිටියේ ගංගා දෙකක එකතුවෙන් ගමන් කරනා කැලණි නදිය සම සමව පෝෂණය කරන්​ෙන් මස්කෙළිය ඔය සහ කෙසෙල්ගමු ඔයයි. එකම ඉසව්වක එකම මාර්ගයක දෙපැත්තේ පිහිටි මෙම ගංගා යුගලය පොල්පිටියේ සිට සමාන්තරව වෙන් වෙන්ව ගමන් කළද අවසාන ඉසව්ව වන විට එම ගංගා යුගලය එකිනෙකට වෙනස් දේශගුණික හා පාරිසරික තත්ත්වයන් පිරුණු ලංකාවේ සුප්‍රසිද්ධ වන රක්‍ෂිත දෙකකින් ආරම්භ වන බවේ සත්‍යතාව සොයා අප එහි මූලාරම්භය සොයා පියමැන්නේ දරුණු අවදානම් තත්ත්වවලටද මුහුණ දෙමිනි.

අතීත කාව්‍යයක අප ඔබ සැම අසා අැත්තේ ‘‘මහවැලි, කැලණි, කළු, වලවේ ගංගා, සමනොල ගිර කුළින් පැන නැංගා’’ ලෙසිනි. නමුත් ගවේෂණාත්මක සංචාරක වාර්තාකරණයේ යෙදෙන අපි එම කාව්‍යය අසත්‍යයක් බව මින් පෙරද සඳහන් කළෙමු. මන්දයත් මහවැලි සහ වලවේ ගඟේ උපත සිදුවන්නේ හෝර්ටන්තැන්නෙන්. තවද කැලණි ගඟට සමව උපත දෙන්නේ ගවරවිල සහ හෝර්ටන්තැන්නේ කිරිගල්පොත්ත දකුණු බෑවුමෙන් බව මෙහිදී අපි සොයා ගත්තෙමු.

තවද කළු ගඟේ ආරම්භය සිදුවන්නේ සමනල කන්දෙන් බවද අසත්‍යයක් වන අතර කළු ගඟේ මුල් දියවර පැන නගින්නේ බෑණ සමනලින් වන අතර එහි ප්‍රධාන පෝෂකයක් වන කුරු ගඟ හීන් පිදුරුතලාව සහ මහ පිදුරුතලාව පිහිටි ඉසව්වෙන් පටන් ගන්නා වග අපි අත්දැක ඇත්තෙමු. කුතුහලය සහ ත්‍රාසය දනවන මෙම ගංගාවන්හි උපත සොයා යන ගමනේදී අප මීට පස් වසරකට පෙර වලවේ ගඟේ උපත සොයා ගත්තේ හෝර්ටන්තැන්නේ නොකිළිටි ඉසව්වක පය තබමිනි. එලෙසම කල්‍යාණියේද උපත සොයා අප හෝර්ටන්තැන්නේ කිරිගල් පොත්ත කන්දේ දකුණු බෑවුමෙන් ගමන පටන් ගත්තේ විස්මය දනවනසුළු දිය සීරා සහ ජල උල්පත් ගණනාවක් පිරුණු වගුරු මතිනි.
පොල්පිටියේ සිට ඇබර්ඩීන් ඇල්ල හරහා නෝර්ටන් පාලම අසලට පැමිණි අප කාසල්රි ජලාශය වෙත ගමන් කළේ මීට පෙර ලිපියේදීය. පසුව අප අද ගමන ආරම්භ කළේ කාසල්රි ජලාශයේ සිටය. කාසල්රි ජලාශය, මායිම දිගේ දික් ඔය හරහා ගමන් කළ පසු නෝර්වුඩ් වෙතට අපි ළඟා වුණෙමු.

නෝර්වුඩ් යනු හැටන් නගරයේ සිට සිරිපාදේ යන විට හැරී යා යුතු ප්‍රධාන මංසන්ධිය පිහිටි නගරයයි. නෝර්වුඩ්වලින් ඉදිරියටම ගමන් කරන විට බොගවන්තලාව හරහා මාර්ගය මාරතැන්න ඔස්සේ බලංගොඩ දක්වා ගමන් කළ හැක. අනෙක් පසින් නෝර්වුඩ් සිට රොක්වුඩ් හරහා මස්කෙළියට පැමිණ නල්ලතන්නියට ගමන් කළ හැක. හැටන් සිට සිරිපාදේ යා හැකි පහසුම සහ ළඟම මාර්ගය මෙය වන අතර මෙහිදී ඔබට කාසල්රි සහ මාඋස්සා ජලාශ යුගලයේම සුන්දරත්වය දැකබලා ගනිමින් ගමන් කළ හැක. අනෙක් පසින් නෝර්වුඩ් සිට අප්කොට් හරහා ඉතා දීර්ඝ හා දුෂ්කර මාර්ගයක් හරහා අතිශය සුන්දර කඳු මිටියාවත් සහ තේ වතු අතරින් මස්කෙළියට වුව ගමන් කළ හැකිය.

නෝර්වුඩ් සිට අප මීළඟට ගමන් කළේ බොගවන්තලාව දෙසටය. මෙහිදී මාර්ගයේ වම් පස පහළින් ගලා යන්නේ කෙසෙල්ගමු ඔය වේ. මෙහිදී අප දකින ගංගාව සාමාන්‍ය වශයෙන් යුතු වන අතර ගල් කුට්ටි සහ විවිධ අතුරු ඇළ මාර්ග පවා ඊට සම්බන්ධ වන ආකාරය දැකගත හැකි විය.

මෙහිදී කෙසෙල්ගමු ඔය ජන ජීවිතයට බොහෝ සමීප බව අපි දුටුවෙමු. බොහෝ ස්ථානවල ජනතාව තම දෛනික කර්තව්‍ය සඳහා ගංගා ජලය උපයෝගී කර ගන්නා බවත්. ඇතැම් ස්ථානවල ගංගාව කුණු අපද්‍රව්‍ය වලින් අපවිත්‍ර වී තිබෙන බවත් අපි දුටුවෙමු. හැටන් සිට බලංගොඩ දක්වා ගමන් කරන බස් රථ මෙම මාර්ගය හරහා ගමන් කරන අතර එම මාර්ගයේ සමස්ත දුර කිලෝමීටර් 65කට ආසන්න වේ. නමුත් පළාත් දෙකක් අතර දිවෙන එම මාර්ගයේ ගමන් කිරීමට බොහෝ වේලාවක් ගත වන අතර ඊට හේතුව නම් මාර්ගයේ තිබෙන පටු බව හා දුෂ්කරතාවයි.

නමුත් සමස්ත මාර්ගයම නෙත පිනවන සුන්දර දර්ශන වලින් අලංකෘත වී තිබෙන බව කිවයුතුමය. නෝර්වුඩ් පසුකර කිලෝමීටර කිහිපයක් දුර ගමන් කළ පසු අප ළඟා වූයේ ටින්සින් නගරයටයි. බොගවන්තලාවේ පිහිටි ප්‍රධානතම වාණිජ ඉසව්ව මෙය වන අතර අප තවදුරටත් බොගවන්තලාව නගරය පසු කරමින් ඉදිරියටම ගමන් කළේ බොගවාන වතුයාය පිහිටි ප්‍රදේශයටයි.

මෙම ඉසව්ව පසු කරන අපට රොග්විල් වතුයායේ කෙලවර පිහිටි විශාල කඳුවැටිය දැකගත හැකි අතර එම කඳුවැටියේ උසම ස්ථානය වනුයේ මීටර් 2016ක පමණ උසින් යුත් එල්බැද්ද කන්දය. ආගරපතන සහ බොගවන්තලාව වෙන්කරන එල්බැද්ද කැලේ ඉතා විශාල දිගු කඳුවැටියකි. මෙම කඳුවැටිය බොගවන්තලාවේ හරිත කන්ද සහ සබැඳිව ඩයගම මාර්ගය මායිම දක්වා පැතිර පවතියි. එල්බැද්ද කඳු වැටියෙන් අැදහැලෙන අතිරේක දිය දහරා රාශියක් තේ වතු මැදින් ගලාගෙන ගොස් කෙසෙල්ගමු ඔය පෝෂණය කරන වග අප මීට පෙර එල්බැද්ද කඳු තරණයේදී අපි දැක ඇත්තෙමු.

බොගවාන වතුයාය දක්වා ගමන් කළ අපට මීට තෙවසරකට පමණ හරිතකන්ද තරණය කළ ආකාරය සිහියට නැගුණු අතර නැවතත් අප බොගවාන වතුයායට හරවා කර්මාන්තශාලාව දෙසට ගමන් කළේ කෙසෙල්ගමුව ඔය උඩින් ඇති පාලම මතටය.
විශාල යකඩවලින් නිර්මාණය කර ඇති මාර්ගය දුම්රිය මාර්ගයක් සඳහා යොදන පාලමක ලක්‍ෂණ ගෙන හැර පානලදී. ගල්කුට්ටි, ගස්අතු සහ විවිධ බාධක මැදින් ගලාගෙන යන කෙසෙල්ගමු ඔය විටෙක පෙණ පිඩු නගමින් ඝෝෂාකාරීව ගලයි. එහි සුන්දරත්වයට සහ අලංකාර බවට නම් කිසිදු බාධාවක් තිබුණ බව අපි නුදුටුවෙමු.
නැවතත් බලංගොඩ මාර්ගයට පැමිණි අප ඉදිරියටම ගමන් කිරීමට පටන් ගත්තේ නෝර්ත් කෝට් වතුයාය දෙසටයි. නෝර්ත් කෝට් යනු මෙම ඉසව්වේ පිහිටි අවසන් වතුයායයි. මෙම වතුයාය මායිම වනුයේ හෝර්ටන්තැන්න අභය භූමියයි. කෙසෙල්ගමු ඔය මෙම වතුයාය හරහා ගලා බසින අතර වතුයායේ ඉහළ කෙලවරින් ගංගාව අඳුරු වනළැහැබට පිවිසෙයි. එනම් ගංගාව වතුයාය දක්වා ඉදිරියට ගමන් කිරීමට පටන් ගන්නා අතර එය කෙසෙල්ගමුව ඔයේ අත්දැකීමය. නමුත් මෙහි නොපෙනෙන පැතිකඩ නම් හෝර්ටන්තැන්නේ අඳුරු නිම්නය හරහා ගලාබසින කෙසෙල්ගමුව ඔයයි. මෙහිදී අප ගූගල් සිතියම් සහ 1:50,000 මිනින්දෝරු සිතියම් වැඩිදුර අධ්‍යයනය කරන ලදී.

වැඩිදුර සිතියම් අධ්‍යයනය මගින් අප දුටුවේ ලංකාවේ දෙවන උසම කන්ද වන කිරිගල්පොත්තේ දකුණු බෑවුමෙන් ඇදහැලෙන විවිධ දියසීරා වලින් එම පතනේ පහළ පිහිටි විශාල වගුර පෝෂණය වන බවයි. එම වගුර ගූගල් ත්‍රිමාණ සිතියම් තුලින්ද චන්ද්‍රිකා සිතියම් තුළින්ද අප පැහැදිලිව දැක ගත්තේ ඒ පිළිබඳ සම්මත රූපසටහන්, මිනින්දෝරු සිතියමේ පවා පැහැදිලිව දැක ගැනීමට තිබුණු හෙයිනි.

කෙසෙල්ගමු ඔයට උපත දෙන මෙම වගුර පිහිටියේ හෝර්ටන්තැන්නේ කිරිගල්පොත්ත දකුණු බෑවුමේ තහනම් නොඉඳුල් කලාපයකය. මෙවැනි ප්‍රදේශවල පවතින මඩ තත්ත්වය සහ සංවේදී පාරිසරික පද්ධති පිළිබඳ අප ​ෙහාඳින් දැනුම්වත් හෙයින් මීළඟට අපට අවශ්‍ය වූයේ එම ඉසව්ව නිරීක්‍ෂණය කිරීමයි.

මන්ද කිරිගල්පොත්ත කඳු වැටිය යනු හෝර්ටන්තැන්නේ බටහිර කෙළවර පිහිටි උසම ස්ථානය හා ලංකාවේ දෙවන උසම කඳු මුදුනයි. හෝර්ටන්තැන්න කාර්යාලයේ සිට කිලෝමීටර 7ක පමණ දුරින් පිහිටි මෙම කන්දට ළඟා වීමට සම්මත සංචරණ මාර්ගයක් පවතියි. වලංගු ප්‍රවේශපත්‍රයක් ලබාගෙන උදාසනින්ම ගමන ආරම්භ කළහොත් සවස්වීමට පෙර කඳු මුදුනට ගොස් නැවත ළඟා විය හැක. මන්ද තැනිතලාමය ප්‍රදේශවලින් අඩිපාර පැවතුණද ගමන පුරාවට කුඩා වන ළැහැබවල්, මඩකඩිති හා ජල මූලාශ්‍ර පසුකර දිවෙන මාර්ගය දුෂ්කරතා වලින් පිරී පවතියි.

කැලණි නදියේ සැබෑ උපත සොයා යන මෙම ගමනේදී සොයා ගත් මූලික පසුබිම් කරුණුවලට අනුව කැලණිගඟේ සමස්ත දිග කිලෝමීටර් 145ක් පමණ ලෙසත් එය ලංකාවේ දිගින් 4 වන ස්ථානය පවතින බවත් දැන ගත්තෙමු. නමුත් මෙම ගවේෂණයේදී අප සොයාගත් කරුණු කාරණාවලට අනුව එම දත්ත වෙනස් විය යුතු බව අපි සාක්‍ෂි සහිතව දැනගත්තෙමු. නමුත් මෙම දත්ත අප විසින් සොයාගත් ගවේෂණයේ ප්‍රතිඵලය විනා සම්මත දත්ත නොවන බව මතක් කර සිටින්​ෙනමු.

මහවැලි ගංගාව කි.මී. 335ක දිගින් ලංකාවේ ප්‍රථම ස්ථානයේ වැජඹෙන විට කි.මී. 164ක දිගින් යුත් මල්වතු ඔය දෙවන ස්ථානය ගනියි. කලා ඔය තෙවැනි තැන ගන්නේ කි.මී. 148ක දුරක් දක්වමින් වන අතර කැලණි ගඟ කි.මී. 145ක දුරක් සටහන් කරමින් සිව්වන ස්ථානය ගනියි. යාන් ඔය සහ දැදුරු ඔය එක සමානව කි.මී. 142ක දුරින් යුතුව පස්වන ස්ථානය ගන්නා අතර ලංකාවේ දැවැන්ත ගංගා කිහිපය වන්නේ මේවාය. මීට අමතරව වලවේ ගඟ, මාදුරු ඔය, මහ ඔය, කළු ගඟ, කිරිඳිඔය, කුඹුක්කන් ඔය, මැණික් ගඟ, ගිං ගඟ, මී ඔය සහ ගල් ඔය ගත හැකි අතර මේ සියල්ල කි.මී. 100කට වඩා දිගින් යුතු වේ.

අප මෝදර මෝය කටේ සිට කැලණි ගඟට සමාන්තරව සේදවත්ත, වැල්ලම්පිටිය, කැලණිය, කඩුවෙල, මල්වාන, හංවැල්ල, පූගොඩ, රන්වල, අවිස්සාවේල්ල, දයිගල, රුවන්වැල්ල, යටියන්තොට, කිතුල්ගල හරහා පොල්පිටිය සමනල බලාගාරය වෙත පැමිණියෙමු. පසුව එතැන් සිට සප්තකන්‍යා සහ ලක්‍ෂපාන හරහා නෝර්ටන් වෙත පැමිණ කැනියොන් හරහා මාඋස්සාවට පැමිණියේ සමස්ත ගමනේ දුර කිලෝමීටර 148කට ආසන්න දුරක් ලෙස සටහන් කරගනිමිනි.

මෙහිදී බලනවිට සම්මත කැලණි නදියේ දුර වන කි.මී. 145ට සමානකමක් දක්වන බව අප අත්දැක්කද මාඋස්සාව යනු කැලණි ගඟේ උපත නොවන බව අපි දන්නෙමු. මන්ද මාඋස්සාව යනු මස්කෙළිය ඔයේ උපත පමණි. එනම් කැලණි ගඟෙන් 50%ක් පෝෂණය කරන මස්කෙළිය ඔය පටන් ගන්නා ස්ථානයට ඇති දුර කොළඹ මෝදර සිට දළ වශයෙන් කි.මී. 145ක් හෝ 148ක් අතර පවතියි.

නමුත් කැලණි ගඟේ ඉතිරි අර්ධය පෝෂණය කරනුයේ කෙසෙලස්ගමු ඔයෙනි. එම නිසා අප පොල්පිටියේ සිට අැබර්ඩීන් ඇල්ල හරහා නෝර්ටන් පාලමට පැමිණ එතනින් කාසල්රි ජලාශයටත්, නෝර්වුඩ්, ටින්සින් සහ බොගවන්තලාව හරහා නෝර්ත් කෝට් වතුයායට පැමිණියේ සමස්ත ගමනේ දුර කි.මී. 175ක් පමණ සටහන් කර ගනිමිනි. නමුත් මෙතැන් සිට ගඟ දිගේ කිරිගල්පොත්ත දකුණු බෑවුමට ඇති දුර දළ වශයෙන් කි.මී. 8ක් පමණ වේ. එහිදී බලන කල කැලණි ගඟේ උපත දෙන අනෙක් ස්ථානය පිහිටි හෝර්ටන්තැන්න කෙසෙල්ගමු ඔයේ ආරම්භක ස්ථානයට කොළඹ මෝදර සිට ඇති මුළු දුර කි.මී. 183කට ආසන්නය. සම සමව උපත දෙන ගංගා දෙකෙන් ඈතින්ම පටන් ගන්නා ගංගාව වනුයේ කෙසෙල්ගමු ඔයයි. එසේ නම් කැලණි ගඟේ සැබෑ දුර නිතැතින්ම කිලෝමීටර 180කට වඩා වැඩිය. එනම් ලංකාවේ දෙවන දිගම ගංගාව විය යුත්තේ කැලණි ගංගාවයි.
සාමාන්‍යයෙන් ගංගාවක් යනු විවිධ දිශාවලින් එකතු වන විවිධ ජල පෝෂකවල එකතුවෙන් හටගන්නා ප්‍රධාන තෝතැන්නකි. එලෙස බලන විට කැලණි ගඟට සීතාවක ගඟ, ගුරුගොඩ ඔය, වීඔය ආදී ප්‍රධාන අවශේෂ දියදහරාවන් එකතු වේ. ඊට අමතරව මස්කෙළිඔය සහ කෙසෙල්ගමු ඔය ප්‍රධානම පෝෂක දෙකක් වන්නේ පොල්පිටියේදී මෙම ගංගා දෙකම එකට එකතුවී ඉන් පහළට කැලණි ගඟ ලෙස තනි දියවරක් ලෙස එය ගලා යාමයි. එකිනෙකට වෙනස් ස්ථාන දෙකකින් මෙම ගංගා යුගලය ආරම්භ වන බැවින් ප්‍රධාන සම්බන්ධිතය ඇති පොල්පිටියේ සිට දුරින්ම පිහිටි ස්ථානයකින් හට ගන්නා ගංගාව එම ගඟේ ප්‍රථම ආරම්භක ස්ථානය ලෙස සැලකිය හැකිය. එම නිසා කැලණි ගඟේ මූලරම්භය වන්නේ හෝර්ටන්තැන්න වන අතර ඒ අනුව බලන කල කැලණි ගඟ ලංකාවේ දෙවන දිගම ගංගාව වන්නේ කි.මී. 180කට වඩා වැඩි දුරක් සටහන් කරමින් පළාත් 3ක් හරහා දිස්ත්‍රික්ක 4ක් අතරින් ගලා යමිනි.

මත්ස්‍ය කර්මාන්තය, ප්‍රවාහන සේවය, සංචාරක කර්මාන්තය, මැණික් කර්මාන්තය, හේන් ගොවිතැන් වගාව, පානීය ජල අවශ්‍යතාව සහ ජල විදුලිය ජනනය කිරීමට මහත් පිටිවහලක් ලබාදෙන කැලණි ගඟ පූජනීයත්වයෙන්ද සැලකිය යුතු ගංගාවකි. ලංකාවේ මුල්ම සතුරු ආක්‍රමන හා අවසන් සතුරු ආක්‍රමණවලදී හෙලයන්ට යුද වැදීමට සහ සැඟවී සිටීමටත් විවිධ රාජ නිධාන ගබඩා කිරීමටත් කැලණි ගඟ උපකාරී වුණි.

ලංකාවේ පලලින් වැඩිම ගඟ වන්නේද කැලණි ගඟයි. ගංවතුර සමවලදී දැඩි ලෙස පිටාර ගලන කැලණි ගඟේ ආරක්‍ෂාවට වැඩි අවධානයක් වාරිමාර්ග අංශයෙන් යොමු කරනුයේ එදා පටන් අද වන තුරු කොළඹට අවාදානමක් විය හැකි එකම ජල මූලාශ්‍රය මෙය වන බැවිනි.

තවද කොපමණ නියං සමයක් උදාවුවද කැලණි ගඟේ බස්නාහිර කොටස කිසි විටක නොසිඳෙන බවත් එම ප්‍රදේශය ගඟේ ගැඹුර සහ උමං වැඩිම ඉසව්ව ලෙසත් අපි මෙහිදී අත්දැක්කෙමු. මතු දිනක කැලණි ගඟේ මෙම ඉසව්ව සිඳීයාවි නම් එය සමස්ත ලංකාවේම දැඩි නියඟයකට පත් වූ පසුවය. කෙසේ හෝ පුරා කොටස් 13ක් හරහා අපි ඔබව කොළඹ මෝදර මෝය කටේ සිට කැලණි ගඟේ උපත දක්වා ගෙනගියෙමු. සැබවින්ම කැලණි ගඟ යනු හෙළ අතීතය හා ප්‍රෞඪත්වය පිරුණු වර්තමානයේ වාණිජ අංශයෙන් අතිශය වැදගත් ගංගාවකි.
ශමින්ද රන්ශාන් ප්‍රනාන්දු
-ලංකාදීප- පුවතට ලියූ ලිපි මාලාවේ අවස. ලිපිය අසුරෙනි.