කොවිඩ් ආසාදිතයින්ගේ සිරුරෙන් නව්‍ය කොරෝනා වෛරසය මුළුමනින්ම පහවයාම සඳහා මාසයක පමණ කාලයක් ගතවිය හැකි බව නවතම පර්යේෂණයකින් හඳුනාගෙන තිබේ.
මේ සම්බන්ධයෙන් කළ පර්යේෂණ තොරතුරු බ්‍රිතාන්‍ය වෛද්‍ය සඟරාවක දැක්වේ.
ඒ අනුව, එක් වරක් වෛරසය ආසාදනය වූ තැනැත්තෙකු එයින් සුව වූ පසු එම රෝගියා කොරෝනා වෛරසය රහිත පුද්ගලයෙක් බව හඳුනාගත හැක්කේ මාසයකට පසුව සිදු කෙරෙන පීසීඅර් පරික්ෂාවක් අනුව බව එම සඟරාවේ පළ කළ ලිපියක දැක්වේ.
මොදේනා විශ්වවිද්‍යාලයේ වෛද්‍ය ෆ්රැන්සෙස්කෝ වෙන්චුරෙල්ලි ඇතුළු කණ්ඩායමක් රෙජියෝ එමිලියා පළාතේ රෝගීන් 1,162කු යොදාගෙන කළ පීසීඅර් පරීක්ෂණ මත එම නිගමනයට එළඹ තිබේ.
කොවිඩ් ව්‍යාප්තිය මධ්‍යයේ වුවත් මේ වනවිට ලෝකයේ බොහෝ රටවල් සිය දෛනික ජීවන රටාවට හුරුවෙමින් පවති.
කෙසේ නමුත් නිවැරැදි සීමාකිරීම් යටතේ පමණක් නැවත රටවල් විවෘත කළ යුතු බව මේ සම්බන්ධයෙන් අදහස් දක්වමින් ලෝක සෞඛ්‍ය සංවිධානයේ ප්‍රධානී ටෙඩේරෝස් ඇඩිනම් ගේබ්‍රියාසෙස් පවසා තිබේ.
ඔහු වැඩිදුරටත් පෙන්වාදෙන්නේ එසේ නොමැතිව ජනතාව සුලභව එක්වන ඉසව් පැවැත්වීමෙන් මහා ව්‍යසනයක් ඇතිවිය හැකි බවය.
සංචරණ සීමාවලින් හෙම්බත්ව සිටින ජනතාව හැකි ඉක්මනින් නැවතත් සිය සුපුරුදු ජීවන රටාව ආරම්භකිරීමට සූදානමින් පසුවුවත්, එය ඉතාමත් කල්පනාවෙන් සහ ආරක්ෂිත ක්‍රමවේද යටතේ සිදුකළ යුතු බව ලෝක සෞඛ්‍ය සංවිධාන ප්‍රධානියා පැවසීය.