දිවයින වටා වන මුහුදු ප්‍රදේශවල වැසි හෝ ගිගිරුම් සහිත වැසි ඇති වන බවත් සුළං නිරිත දෙසින් හමන අතර සුළඟේ වේගය පැ.කි.මී.30-40 අතර අගයක් ගන්නා බවත් කාලගුණවිද්‍යා දෙපාර්තමේන්තුවේ ස්වභාවික විපත් පිළිබඳ පූර්ණ අනතුරු ඇඟවීමේ මධ්‍යස්ථානය සඳහන් කරයි.

සාර්ක් කලාපීය ආයෝජන සමුළුව අද (06) කොළඹ දී පැවැත්වීමට නියමිතය. කොළඹ, හිල්ටන් හෝටලයේ දී පැවැත්වෙන සමුළුවට ප්‍රධාන ආරාධිත අමුත්තා ලෙස අග්‍රාමාත්‍ය රනිල් වික්‍රමසිංහ මහතා එක්වීමට නියමිතය.

ශ්‍රී ලංකා රේගු දෙපාර්තමේන්තුවේ II වැනි ශ්‍රේණියේ සහකාර රේගු අධිකාරී තනතුරුවලට බඳවා ගැනීම සඳහා වන විවෘත තරඟ විභාගය  - 2017 විභාගය  ලබන 10 වැනි දා කොළඹ පිහිටි විභාග මධ්‍යස්ථාන 48 ක දී පැවැත්වීමට කටයුතු කර ඇති  බව විභාග කොමසාරිස් ජනරාල් ඩබ්ලිව්.එම්.එන්.ජේ.පුෂ්පකාර මහතා සඳහන් කරයි.

2017 අධ්‍යයන වර්ෂයට අදාළ තෙවැනි පාසල් වාරය අද (06) න් ආරම්භ විය. ඒ අනුව අධ්‍යාපන පොදු සහතික පත්‍ර උසස් පෙළ විභාගයේ පිළිතුරු පත්‍ර ඇගයීම සඳහා යොදා නොගන්නා පාසල් 05ක් හැර අනෙකුත් පාසල් මෙලෙස ආරම්භ කරයි.
 

ඉදිරි දින කිහිපයේදී විශේෂයෙන් සැප්තැම්බර් මස 01 දින සිට 02 වෙනි දින දක්වා දිවයිනේ (විශේෂයෙන් උතුරු, උතුරු-මැද, නැගෙනහිර, ඌව සහ දකුණ පළාත්වල) වැසි තත්වයේ වැඩිවීමක් අපේක්ෂා කරන බව කාලගුණවිද්‍යා දෙපාර්තමේන්තුව අද (31) නිකුත් කළ නිවේදනයේ සඳහන් වෙයි.

අගෝස්තු මස 31 දින සිට සැප්තැම්බර් මස 02 වෙනි දින දක්වා දිවයිනේ බොහෝ පළාත් වල (විශේෂයෙන් ම උතුරු, උතුරු-මැද,  නැගෙනහිර, ඌව සහ මධ්‍යම පළාත් වල) සවස් කාලයේ ගිගුරුම් සහිත වැසි ඇති වීමේ හැකියාව වැඩි වන බව කාලගුණවිද්‍යා දෙපාර්තමේන්තුව නිවේදනය කරයි.

මෙරට වැඩිම මාර්ග තදබදයක් තිබෙන මාළබේ  සිට පිටකොටුව දක්වා වූ මාර්ගයේ පොල්දූව පාලමේ  සිට බොරැල්ල දක්වා වූ කොටසේ බස් මංතීරු ක‍්‍රමය ඊයේ (29) උදෑසන 6.00 සිට 9.00 දක්වා ක්‍රියාත්මක කරනු ලබන බව ඇමති පාඨලී චම්පික සඳහන් කරයි. බොරැල්ල මරදාන මාර්ගය මේවන විට පිළසකර කරමින් පවතින අතර නොවැම්බර් මාසයේදී, බොරැල්ලේ සිට මරදාන දක්වා උදෑසන 6.00 සිට 9.00 වන තෙක් ස්ථාවර බස් මංතීරුවක් ආරම්භ කිරීමට කටයුතු   කරන බවත් හෙතෙම පැවසීය.
 

ශ්‍රී ලංකා විදුලි සංදේශ නියාමන කොමිෂන් සභාව විසින් නිකුත් කරනු ලබන ආධුනික ගුවන් විදුලි ක්‍රියාකරවන්නන්ගේ ප්‍රවීණතා සහතිකය සඳහා වූ පරීක්ෂණය - 2017  සඳහා අයඳුම්පත් කැඳවීම ගැසට් කර ඇති බව ශ්‍රී ලංකා විභාග දෙපාර්තමේන්තුව සඳහන් කරයි. එම පරීක්ෂණයේ අයදුම්පත් භාර ගැනීම ලබන මස 08 වැනි දිනෙන්  අවසන් වේ.

මිරිහාන පොලිස් වසමේ කෝට්ටේ රජමහා විහාරස්ථානයේ ඇසළ පෙරහර මංගල්‍යයේ අවසන් දළඳා පෙරහර සැප්තැම්බර් 01දා සහ 02දා පස්වරු 7.30සිට වීථි සංචාරය කරන බැවින් එම ප්‍ර දේශයේ මාර්ග කිහිපයක රථවාහන ගමනාගමනය සීමා කෙරෙන බවත් එබැවින් විකල්ප මාර්ග භාවිත කරන ලෙසත් පොලිස් මූලස්ථානය මහජනතාවගෙන් ඉල්ලා සිටී.